കോഴിക്കോട്: കാലിക്കറ്റ് യൂണിവേഴ്സിറ്റിയിലേയ്ക്ക് എംഎസ്എഫ് പ്രവര്‍ത്തകര്‍ നടത്തിയ മാര്‍ച്ചിനിടെ സംഘര്‍ഷം. കല്ലേറില്‍ നിരവധി വിദ്യാര്‍ഥികള്‍ക്കും മാധ്യമപ്രവര്‍ത്തകര്‍ക്കും പരിക്കേറ്റു. കാലിക്കറ്റ് യൂണിവേഴ്സിറ്റിയിലെ സി സോണ്‍ കലോത്സവം ആയി ബന്ധപ്പെട്ട തര്‍ക്കമാണ് സംഘര്‍ഷത്തില്‍ കലാശിച്ചത്.
കലോത്സവത്തില്‍ പങ്കെടുക്കാന്‍ എംഎസ്എഫ് പ്രവര്‍ത്തകരെ എസ്എഫ്ഐ പ്രവര്‍ത്തകര്‍ അനുവദിക്കുന്നില്ലെന്നായിരുന്നു പരാതി. തുടര്‍ന്ന് കഴിഞ്ഞ ദിവസം എസ്എഫ്ഐ എംഎസ്എഫ് പ്രവര്‍ത്തകര്‍ തമ്മില്‍ യൂണിവേഴ്സിറ്റിയില്‍ സംഘര്‍ഷമുണ്ടായിരുന്നു. ഇതിന്റെ തുടര്‍ച്ചയെന്നോണമാണ് എംഎസ്എഫ് പ്രവര്‍ത്തകര്‍ കാലിക്കറ്റ് യൂണിവേഴ്സിറ്റിയിലേക്ക് ഇന്ന് പ്രതിഷേധവുമായി എത്തി സംഘര്‍ഷമുണ്ടാക്കിയത്.
സംഭവത്തില്‍ നിരവധി വിദ്യാര്‍ത്ഥികള്‍ക്കും മാധ്യമ പ്രവര്‍ത്തകര്‍ക്കും പരിക്കേറ്റു. ആദ്യഘട്ടത്തില്‍ വിദ്യാര്‍ത്ഥികളെ പൊലീസിന് നിയന്ത്രിക്കാനായിരുന്നെങ്കിലും പിന്നീട് കൂടുതല്‍ പ്രവര്‍ത്തകരെത്തി പൊലീസിന് നേരെ കല്ലെറിഞ്ഞതോടെ കാര്യങ്ങള്‍ കൈവിട്ടു. അക്രമാസക്തരായ പ്രവര്‍ത്തകരെ പിരിച്ചുവിടാന്‍ പലവട്ടം പോലീസിന് ലാത്തി വീശേണ്ടി വന്നു. എസ്എഫ്ഐ എംഎസ്എഫ് പ്രതിനിധികളുമായി പൊലീസ് ചര്‍ച്ച നടത്തുന്നതിനിടെയായിരുന്നു സംഘര്‍ഷമുണ്ടായത്. സ്ഥലത്ത് ഇപ്പോള്‍ മലപ്പുറം ഡിവൈഎസ്പിയുടെ നേത്യത്വത്തിലുള്ള പോലീസ് നിലയുറപ്പിച്ചിട്ടുണ്ട്.
https://ift.tt/2wVDrVv
This post have 0 komentar
EmoticonEmoticon