ബിജെപിയ്ക്ക് ഭൂരിപക്ഷം പ്രവചിക്കുന്ന എക്‌സിറ്റ് പോള്‍ ഫലങ്ങള്‍ പുറത്തു വന്നതോടെ കര്‍ണാടകയിലെ കോണ്‍ഗ്രസില്‍ പൊട്ടിത്തെറി . ന്യൂനപക്ഷങ്ങളെ അവഗണിച്ചതാണ് കോണ്‍ഗ്രസിന് വിനയായതെന്ന് കര്‍ണാടകത്തിലെ മുതിര്‍ന്ന കോണ്‍ഗ്രസ് നേതാവ് റോഷന്‍ ബെയ്ഗ് ആരോപിച്ചു.
കര്‍ണാടകയിലെ നിലവിലെ പ്രതിസന്ധിക്ക് കാരണം കെ പി സി സി പ്രസിഡണ്ട് ഗുണ്ടുറാവുവും എ ഐ സി സി ജനറല്‍ സെക്രട്ടറി കെ സി വേണുഗോപാലുമാണെന്നും റോഷന്‍ ബെയ്ഗ് കുറ്റപ്പെടുത്തി. വേണുഗോപാല്‍ വെറും കോമാളിയാണെന്നും രാഹുല്‍ ഗാന്ധിയെ കുറിച്ച് ഓര്‍ക്കുമ്പോള്‍ ദുഃഖമുണ്ടെന്നും റോഷന്‍ പറഞ്ഞു. സിദ്ധരാമയ്യ, കെ.സി വേണുഗോപാല്‍ ഉള്‍പ്പെടെയുള്ള നേതൃത്വത്തിനെതിരെ കടുത്ത ഭാഷയിലാണ് കോണ്‍ഗ്രസ് നേതാവ് പ്രതികരിച്ചത്.
മുസ്ലിം സമുദായത്തില്‍ നിന്നുള്ള ഒരാള്‍ക്ക് മാത്രമാണ് കോണ്‍ഗ്രസ് ടിക്കറ്റ് നല്‍കിയത്. ഇത് തിരഞ്ഞെടുപ്പില്‍ പ്രതിഫലിക്കും. ആവശ്യം വന്നാല്‍ മുസ്ലിം സമുദായം ബിജെപിയുമായി കൈകോര്‍ക്കണമെന്നും ഒരു പാര്‍ട്ടിയോട് മാത്രമായി കൂറ് പുലര്‍ത്തേണ്ടതില്ലെന്നും റോഷന്‍ പറഞ്ഞു. ആര് സ്‌നേഹത്തോടെ വിളിച്ചാലും അവരോടൊപ്പം പോകുമെന്നും അദ്ദേഹം കൂട്ടി ചേര്‍ത്തു.
എക്‌സിറ്റ് പോള്‍ ഫലങ്ങള്‍ കേന്ദ്രത്തില്‍ ഭൂരിപക്ഷത്തോടെ ഭരണത്തുടര്‍ച്ച പ്രവചിക്കുമ്പോള്‍ ആടി നില്‍ക്കുന്ന കര്‍ണാടകയിലും മധ്യപ്രദേശിലും കോണ്‍ഗ്രസ് സര്‍ക്കാരിനെ മറിച്ചിട്ട് അധികാരം പിടിക്കാന്‍ ഒരുങ്ങുകയാണ് സംസ്ഥാന ബിജെപി. ഇതിനിടെയാണ് കോണ്‍ഗ്രസ് നേതാവിന്റെ വിവാദ പ്രസ്താവന.
This post have 0 komentar
EmoticonEmoticon