തിരുവനന്തപുരം: പൗരത്വ ഭേദഗതി നിയമത്തിനെതിരെ ജില്ല കോണ്‍ഗ്രസ് കമ്മിറ്റികളുടെ നേതൃത്വത്തില്‍ 12 ജില്ലകളില്‍ യു.ഡി.എഫ് മനുഷ്യ ഭൂപടം തീര്‍ത്തു. വയനാടും കോഴിക്കോടും ഒഴികെയുള്ള ജില്ലകളില്‍ ഒരുക്കിയ മനുഷ്യ ഭൂപടത്തില്‍ ആയിരക്കണക്കിന് പ്രവര്‍ത്തകരാണ് പങ്കെടുത്തത്. ത്രിവര്‍ണ പതാകയുടെ നിറങ്ങളുള്ള തൊപ്പികള്‍ ധരിച്ചാണ് പ്രവര്‍ത്തകര്‍ ഭൂപടത്തില്‍ അണിനിരന്നത്.
വൈകുന്നേരം നാല് മണിയോട് കൂടിത്തന്നെ 12 ജില്ലകളിലും തിരഞ്ഞെടുത്ത മൈതാനങ്ങളിലും ഭൂപടം തീര്‍ക്കാന്‍ പ്രവര്‍ത്തകര്‍ എത്തിച്ചേര്‍ന്നിരുന്നു. മഹാത്മാ ഗാന്ധി വെടിയേറ്റ് വീണ സമയമായ വൈകുന്നേരം 5.17 നാണ് കേരളത്തില്‍ പ്രവര്‍ത്തകര്‍ മനുഷ്യ ഭൂപടം തീർത്തത്. പിന്നാലെ ഭരണഘടനാ സംരക്ഷണ പ്രതിജ്ഞയും പ്രവര്‍ത്തകര്‍ ഏറ്റുചൊല്ലി. ഇതിനുശേഷം പൊതുയോഗവും നടന്നു.
തിരുവനന്തപുരം പുത്തരിക്കണ്ടം മൈതാനിയില്‍ നടന്ന പരിപാടി മുതിര്‍ന്ന നേതാവ് എ.കെ ആന്റണി ഉദ്ഘാടനം ചെയ്തു.കണ്ണൂരില്‍ കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രനും പ്രതിപക്ഷ നേതാവ് രമേശ് ചെന്നിത്തലയും പരിപാടിയില്‍ പങ്കെടുത്തു.
കൊച്ചിയിലെ പൊതുസമ്മേളനത്തില്‍ മുതിർന്ന നേതാവ് പി.പി തങ്കച്ചനും തൃശ്ശൂരില്‍ പ്രതിപക്ഷ ഉപനേതാവ് എം.കെ മുനീറും പങ്കെടുത്തു. പത്തനംതിട്ട പ്രൈവറ്റ് ബസ് സ്റ്റാന്റിൽ നടന്ന മനുഷ്യ ഭൂപടം ആർ.എസ്.പി നേതാവ് ഷിബു ബേബി ജോൺ ഉദ്ഘാടനം ചെയ്തു. ആലപ്പുഴ ബീച്ചില്‍ ഒരുക്കിയ ഭൂപടത്തില്‍ എം.എം ഹസ്സന്‍ പങ്കെടുത്തു.
മറ്റ് ജില്ലകളില്‍ യു.ഡി.എഫിന്റെ മുതിര്‍ന്ന നേതാക്കളാണ് പങ്കെടുത്തത്. മുന്‍മന്ത്രിയും, കോണ്‍ഗ്രസ് നേതാവുമായിരുന്ന എം. കമലത്തിന്റെ നിര്യാണത്തെ തുടര്‍ന്നാണ് വടകരയില്‍ നടത്താനിരുന്ന മനുഷ്യ ഭൂപടം പരിപാടി മാറ്റി വെച്ചത്.
വയനാട് ജില്ലയില്‍ ഇന്ന് രാവിലെ രാഹുല്‍ ഗാന്ധി എംപിയുടെ നേതൃത്വത്തില്‍ ഭരണ ഘടനാ സംരക്ഷണ റാലി സംഘടിപ്പിച്ചിരുന്നു. കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍, പ്രതിപക്ഷ നേതാവ് രമേശ് ചെന്നിത്തല, എഐസിസി ജനറല്‍ സെക്രട്ടറി കെ.സി. വേണുഗോപാല്‍ തുടങ്ങിയവര്‍ രാഹുലിനോപ്പം മാര്‍ച്ചില്‍ പങ്കെടുത്തു.
https://ift.tt/2wVDrVv
This post have 0 komentar
EmoticonEmoticon