ന്യൂഡല്‍ഹി: പുതിയ ഡയറക്ടറെ തിരഞ്ഞെടുക്കാന്‍ പ്രധാനമന്ത്രി നരേന്ദ്രമോദിയുടെ നേതൃത്വത്തില്‍ ഉന്നതതലസമിതി യോഗം ചേരാനിരിക്കെ സി.ബി.ഐയില്‍ വീണ്ടും കൂട്ട സ്ഥലംമാറ്റം. 2ജി കേസ് അന്വേഷിക്കുന്ന വിവേക് പ്രിയദര്‍ശി ഉള്‍പ്പെടെ 20 പേരെയാണ് കഴിഞ്ഞദിവസം ഇടക്കാല ഡയറക്ടര്‍ നാഗേശ്വരറാവു സ്ഥലംമാറ്റിയത്. പ്രിയദര്‍ശിയെ ഡല്‍ഹിയില്‍ നിന്ന് ചണ്ഡീഗഡിലേക്കാണ് മാറ്റിയത്.
തൂത്തുക്കുടിയില്‍ സ‌്റ്റെര്‍ലൈറ്റ‌് പ്ലാന്റിനെതിരെ പ്രക്ഷോഭം നടത്തിയവരെ വെടിവച്ച കേസ് അന്വേഷിക്കുന്ന എ ശരവണനെ മുംബൈ ബാങ്കിങ‌്, സെക്യൂരിറ്റീസ‌് വിഭാഗത്തിലേക്ക‌് മാറ്റി. പ്രധാനപ്പെട്ട ഉദ്യോഗസ്ഥരുടെ നീക്കങ്ങള്‍ നിരീക്ഷിക്കുന്ന പ്രത്യേകവിഭാഗത്തില്‍ ജോലി ചെയ‌്തിരുന്ന ഉദ്യോഗസ്ഥന്‍ പ്രേംഗൗതമിനെയും സ്ഥലംമാറ്റി.
നേരത്തെ സിബിഐ സ‌്പെഷ്യല്‍ ഡയറക്ടര്‍ രാകേഷ‌് അസ‌്താനയ‌്ക്കെതിരായ അഴിമതിക്കേസ‌് അന്വേഷിച്ചിരുന്ന ഉദ്യോഗസ്ഥരെ നാഗേശ്വരറാവു സ്ഥലംമാറ്റിയിരുന്നു. നാഗേശ്വരറാവുവിനെ ഇടക്കാല ഡയറക്ടറാക്കിയത് ചോദ്യം ചെയ്തുള്ള ഹര്‍ജി വ്യാഴാഴ്ച സുപ്രീംകോടതി പരിഗണിക്കുന്നുണ്ട്. അന്ന് തന്നെ പ്രധാനമന്ത്രിയും സുപ്രീംകോടതി ചീഫ്ജസ്റ്റിസും ലോക്സഭാ പ്രതിപക്ഷ നേതാവും ഉള്‍പ്പെട്ട സമിതി പുതിയ സി.ബി.ഐ ഡയറക്ടറെ തിരഞ്ഞെടുക്കാന്‍ യോഗം ചേരുന്നുമുണ്ട്.
http://bit.ly/2wVDrVv
This post have 0 komentar
EmoticonEmoticon