ജീവപര്യന്തം തടവ്​ ശിക്ഷ മരവിപ്പിച്ച്​ ജാമ്യം അനുവദിക്കണമെന്ന്​ കുഞ്ഞനന്തൻ

ടി.പി ചന്ദ്രശേഖരൻ വധക്കേസിലെ ജീവപര്യന്തം തടവ്​ ശിക്ഷ മരവിപ്പിച്ച്​ ജാമ്യം അനുവദിക്കണമെന്ന് ആവശ്യപ്പെട്ട് പ്രതി പി.കെ. കുഞ്ഞനന്തൻ ഹൈക്കോടതിയിൽ ഹർജി നൽകി. ഗുരുതര ആരോഗ്യ പ്രശ്​നങ്ങളുണ്ടെന്നും മതിയായ ചികിത്സ ലഭ്യമാ​ക്കേണ്ടതുണ്ടെന്നും കാണിച്ചാണ്​ ഹർജി. സർക്കാറി​ന്റെ വിശദീകരണം​ തേടിയ കോടതി ഹർജി പരിഗണിക്കുന്നത് വെള്ളിയാഴ്​ചത്തേക്ക് മാറ്റി.

കേസിൽ ​ 13ാം പ്രതിയാണ് പി.കെ. കുഞ്ഞനന്ത​​ൻ​. സി.പി.എം പാനൂർ ഏരിയ കമ്മിറ്റിയംഗമായ കുഞ്ഞനന്തനെ 2012 ലാണ് വിചാരണ കോടതി ജീവപര്യന്തം തടവിന്​ ശിക്ഷിച്ചത്. ശിക്ഷ അനുഭവിക്കുന്നതിനിടെ ശസ്ത്രക്രിയക്കു വേണ്ടി വന്നതായും നട്ടെല്ലിൽ കഴുത്തിനോട്​ ചേർന്ന ഭാഗത്തെ ഡിസ്കിന് തേയ്മാനം ഉണ്ടെന്നും 72കാരനായ കുഞ്ഞനന്ത​ന്റെ ഹർജിയിൽ പറയുന്നു.

ആർത്രൈറ്റിസ് രോഗം മൂർച്ഛിച്ചിരിക്കുകയാണ്​. പരിശോധനകളിൽ ഗുരുതര രോഗങ്ങളുള്ളതായി കണ്ടെത്തിയിട്ടുണ്ട്​. നട്ടെല്ലിന് ശസ്ത്രക്രിയ വേണ്ടി വരുമെന്നാണ് ഡോക്ടർമാർ അറിയിച്ചത്. ആരോഗ്യനില അനുദിനം വഷളായി വരുകയാണ്. കസ്​റ്റഡിയിലായതിനാൽ മതിയായ ചികിത്സ ലഭിക്കുന്നില്ല. ഇതുപോലെ തുടരുകയാണെങ്കിൽ ജയിലിൽ തന്നെയാവും മരണമെന്നും ഹർജിയിൽ വാദിക്കുന്നു.

http://bit.ly/2wVDrVv