ന്യൂഡല്ഹി: ഇന്ത്യയില് നിരോധിക്കപ്പെട്ട ചൈനീസ് വീഡിയോ ആപ്ലിക്കേഷനായ ടിക് ടോക്കിന് വന് സാമ്പത്തിക നഷ്ടം ഉണ്ടായതായി റിപ്പോര്ട്ട്. ടിക് ടോക്കിന്റെ ഉടമസ്ഥരായ ബൈറ്റ് ഡാന്സ് ടെക്നോളജിയ്ക്ക് ദിവസേന 3.5 കോടിയിലധികം രൂപയുടെ നഷ്ടമാണ് ഉണ്ടായിക്കൊണ്ടിരിക്കുന്നത് . ഇത് 250 ല് അധികം ജീവനക്കാരെ ബാധിക്കുമെന്നും കമ്പനി കോടതിയില് ഹാജരാക്കിയ രേഖയെ അടിസ്ഥാനമാക്കി റോയിട്ടേഴ്സ് റിപ്പോര്ട്ട് ചെയ്യുന്നു. ചെറുവീഡിയോകള് ഉണ്ടാക്കി പങ്കുവെക്കാന് സാധിക്കുന്ന വീഡിയോ സ്ട്രീമിങ് ആപ്പ് ആണ് ടിക് ടോക്ക്. ഇന്ത്യയില് മാത്രം 30 കോടിയാളുകളും ലോകവ്യാപകമായി 100 കോടിയാളുകള് ഇത് ഡൗണ്ലോഡ് ചെയ്തിട്ടുണ്ട് എന്നാണ് സെന്സര് ടവര് എന്ന അനലറ്റിക്സ് സ്ഥാപനം നല്കുന്ന കണക്ക്.
മദ്രാസ് ഹൈക്കോടതിയുടെ ഇടക്കാല വിധിയുടെ അടിസ്ഥാനത്തിലാണ് ഗൂഗിള് പ്ലേസ്റ്റോറില് നിന്നും ആപ്പിള് ആപ്പ് സ്റ്റോറില് നിന്നും ടിക് ടോക്ക് ആപ്ലിക്കേഷന് നീക്കം ചെയ്തത്. അശ്ലീല ദൃശ്യങ്ങള് പെരുകുന്നു, നിശ്ചിത പ്രായത്തില് കുറവുള്ള കുട്ടികള് ഉപയോഗിക്കുന്നു തുടങ്ങിയ കാരണങ്ങളാണ് കോടതി ചൂണ്ടിക്കാണിക്കുന്നത്. ഇന്ത്യയില് അതിവേഗം ജനപ്രീതി പിടിച്ചുപറ്റിക്കൊണ്ടിരുന്ന സമയത്താണ് ടിക് ടോക്കിന് കനത്ത തിരിച്ചടി നേരിടേണ്ടി വന്നത്. ഉള്ളടക്കത്തിന്റെ പേരില് ടിക് ടോക്കിനുമേല് നിരോധനം വന്നത് മറ്റ് സോഷ്യല് മീഡിയാ സ്ഥാപനങ്ങളേയും സമ്മര്ദ്ദത്തിലാക്കിയിട്ടുണ്ട്. ടിക് ടോക്കിനെതിരെ യുള്ള പരാതിയില് കേസ് ഇപ്പോഴും നടന്നുകൊണ്ടിരിക്കുകയാണ്. അതിന് ശേഷം മാത്രമേ ടിക് ടോക്കിന് ഇന്ത്യയില് ഒരു തിരിച്ചുവരവുണ്ടാവുമോ എന്ന് പറയാന് സാധിക്കൂ.
This post have 0 komentar
EmoticonEmoticon