കൊറോണ വൈറസ് ലോകത്തെയാകെ ഭീതിയിലാഴ്ത്തി കൂടുതൽ രാജ്യങ്ങളിലേക്ക് പടർന്നു പിടിക്കുകയാണ്. ശ്രീലങ്കയിലും കംബോഡിയയിലും കാനഡയിലുമാണ് വൈറസ് ബാധ ഏറ്റവും ഒടുവില്‍ സ്ഥിരീകരിച്ചത്. അതേസമയം, ചൈനയില്‍ കൊറോണ ബാധയില്‍ മരിച്ചവരുടെ എണ്ണം 106 ആയി.
സ്ഥിതിഗതികള്‍ വിലയിരുത്താനായി ലോകാരോഗ്യ സംഘടനയുടെ ഡയറക്ടര്‍ ജനറല്‍ ചൈനയിലെത്തി. വൈറസ് ബാധയുടെ വ്യാപ്തി വലുതാണെന്നും രോഗികളെ ചികിത്സിക്കുന്ന ഡോക്ടര്‍മാരും കര്‍ശന മുന്‍കരുതല്‍ സ്വീകരിക്കണമെന്നും ലോകാരോഗ്യ സംഘടന അറിയിച്ചു.
ചൈനക്ക് എല്ലാവിധ സഹായവും നല്‍കാന്‍ തയാറാണെന്ന് യു.എസ് പ്രസിഡന്‍റ് ഡോണള്‍ഡ് ട്രംപ് വ്യക്തമാക്കി. തായ് ലന്‍ഡില്‍ വൈറസ് നിയന്ത്രണ വിധേയമാണെന്ന് സര്‍ക്കാര്‍ അറിയിച്ചു.
അതിനിടെ വൈറസ്ബാധ സ്ഥിരീകരിച്ചവരുടെ എണ്ണം 4193 ആയി ഉയര്‍ന്നു. രോഗ പ്രതിരോധത്തിന്‍റെ ഭാഗമായി വുഹാന്‍ ഉള്‍പ്പെടെ 17 ചൈനീസ് നഗരങ്ങള്‍ യാത്രാവിലക്ക് ഏര്‍പ്പെടുത്തി അടച്ചിട്ടിരിക്കുകയാണ്. വുഹാനിലുള്ള തങ്ങളുടെ പൗരന്മാരെ ഒഴിപ്പിക്കാന്‍ ചാര്‍ട്ടര്‍ ചെയ്ത വിമാനങ്ങള്‍ അയയ്ക്കുന്നതിനെക്കുറിച്ച്‌ അമേരിക്കയും ദക്ഷിണകൊറിയയും ജപ്പാനും ആലോചിക്കുന്നതായി റിപ്പോര്‍ട്ടുണ്ട്.
മലയാളികള്‍ അടക്കം എഴുനൂറോളം ഇന്ത്യന്‍ വിദ്യാര്‍ഥികള്‍ വുഹാനിലെയും പരിസരങ്ങളിലെയും സര്‍വകലാശാലകളില്‍ പഠിക്കുന്നുണ്ട്. വുഹാന്‍ അടക്കം ചൈനയിലെ വിവിധ നഗരങ്ങളില്‍ കുടുങ്ങിയ വിദ്യാര്‍ഥികളുടെ സുരക്ഷ ഉറപ്പുവരുത്താനുള്ള പ്രവര്‍ത്തനങ്ങള്‍ എംബസി വഴി നടക്കുന്നുണ്ട്.
https://ift.tt/2wVDrVv
This post have 0 komentar
EmoticonEmoticon