കോട്ടയം: കെവിന് വധക്കേസില് അബിന് പ്രദീപ് കൂറുമാറി. കെവിനെ തട്ടികൊണ്ട് പോകുന്നതുള്പ്പടെ അറിഞ്ഞിരുന്നെന്നാണ് അബിന് ആദ്യം മൊഴി നല്കിയിരുന്നത്. പ്രതികള്ക്കെതിരെ രഹസ്യമൊഴി നല്കിയത് പൊലീസ് ഭീഷണിപ്പെടുത്തിയത് മൂലമാണെന്ന് അബിന് കോടതിയില് പറഞ്ഞു.അക്രമത്തിനുപയോഗിച്ച വാള് ഒളിപ്പിക്കുന്നത് കണ്ടതായും അബിന് അന്വേഷണ സംഘത്തിന് മൊഴി നല്കിയിരുന്നു. ഇക്കാര്യം രഹസ്യമൊഴിയായും നല്കിയിരുന്നു. ഈ മൊഴിയാണ് വിചാരണയ്ക്കിടെ മാറ്റിപ്പറഞ്ഞത്. അതേസമയം, കേസില് ഒന്നാം പ്രതി ഉള്പ്പടെ പന്ത്രണ്ട് പ്രതികളെ ഗാന്ധിനഗറിലെ തട്ടുകട ജീവനക്കാരന് ബിജു തിരിച്ചറിഞ്ഞു. ചാക്കോയും മൂന്നാം പ്രതിയും ഒഴികെയുള്ളവര് മേയ് 27 ന് പുലര്ച്ചെ തട്ടുകടയില് ഭക്ഷണം കഴിക്കാനെത്തിയതായാണ് മൊഴി. തട്ടുകടയില് ഇതിനിടെ പ്രതികളുമായി തര്ക്കമുണ്ടായെന്നും, ഷാനു ചാക്കോയാണ് പണം നല്കിയതെന്നും ബിജു കോടതിയില് പറഞ്ഞു.
കെവിനുമായുള്ള വിവാഹ ശേഷം നീനു താമസിച്ച ഹോസ്റ്റലിന്റെ നടത്തിപ്പുകാരന് ബെന്നി ജോസഫും കോടതിയില് മൊഴി നല്കി. കെവിനും മുഖ്യ സാക്ഷി അനീഷുമാണ് നീനുവിനെ ഹോസ്റ്റലില് എത്തിച്ചതെന്നും ഒരു വര്ഷം താമസ സൗകര്യം വേണമെന്നാണ് പറഞ്ഞതെന്നും സാക്ഷി ബെന്നി വ്യക്തമാക്കി. കെവിനെയും അനീഷിനെയും തട്ടിക്കൊണ്ട് പോയതറിഞ്ഞ് അനീഷിന്റെ ബന്ധു സന്തോഷ് ഹോസ്റ്റലില് വന്നെന്നും ബെന്നി പറഞ്ഞു. നീനുവിനെ കൈമാറിയാല് അനീഷിനെ മോചിപ്പിക്കാമെന്ന് പ്രതികള് പറഞ്ഞതായും സന്തോഷ് ബെന്നിയെ അറിയിച്ചിരുന്നു. എന്നാല് കെവിനോ അനീഷോ നേരിട്ട് എത്താതെ നീനുവിനെ പുറത്തു വിടില്ലെന്ന് പറഞ്ഞതായാണ് ബെന്നിയുടെ മൊഴി. ഗാന്ധിനഗര് പോലീസ് പിന്നീട് നീനുവിനെ സ്റ്റേഷനിലേക്ക് കൊണ്ടുപോയതായും ആറാം സാക്ഷി വ്യക്തമാക്കി.
ദലിത് ക്രിസ്ത്യന് വിഭാഗത്തില്പ്പെട്ട കെവിന് നീനുവിനെ വിവാഹം ചെയ്തതിലുള്ള നീനുവിന്റെ ബന്ധുക്കളുടെ ദുരഭിമാനമാണ് കൊലപാതകത്തിന് കാരണമെന്നാണ് കുറ്റപത്രം. കൊലക്കുറ്റം ഉള്പ്പെടെ പത്ത് വകുപ്പുകളാണ് പ്രതികള്ക്കെതിരെ ചുമത്തിയിട്ടുള്ളത്. ജൂണ് ആറ് വരെ തുടര്ച്ചയായി വിചാരണ നടത്താനാണ് കോടതിയുടെ തീരുമാനം. കഴിഞ്ഞ മെയ് 27നാണ് കേസിനാസ്പദമായ സംഭവം നടന്നത്. പ്രണയ വിവാഹത്തിന്റെ പേരില് ഭാര്യാ സഹോദരന്റെ നേതൃത്വത്തില് കെവിനെ തട്ടിക്കൊണ്ടുപോയി കൊലപ്പെടുത്തിയെന്നാണ് കേസ്.
http://bit.ly/2wVDrVv
This post have 0 komentar
EmoticonEmoticon